QUON SIGNIFIKAS 'PAGINIZO'?

Imajo che © www.gcommeuneidee.com

 

Ye la 27ma di februaro 2019 me publikigis yena mesajo che Facebook en la grupo Ido (integre lektebla hike):

 

Kun plezuro me anuncas ke me jus itere enretigis 6 Ido-verki da me qui aparis en 2002 che Editerio Sudo. [...] Nun me kelke revizis oli ed emendis nur evidenta erori, ma me tote ne chanjis la kontenajo nek la paginizo. [...]

 

Ye la 6ma di januaro 2020 me publikigis yena mesajo sam-loke (integre lektebla hike od anke hike, che Idolisto, ube ol aparis du dii pose):

 

Tandem esas itere disponebla ed acesebla ad omni la importanta e historiala libro:

ANTOLOGIO DIL IDOLINGUO, Tomo I (1908-1928), 238 p.

Kompilita ed editita da Andreas Juste en 1974, transskribita da Brian E. Drake en 2017.

[...] La kompilinto (Andreas Juste) facis kolosal ed absolute admirinda laboro, nam il extraktis “obliviita” gemi de multa revui e buletini ja de longe exhaustita ed apene o tote ne acesebla od obtenebla. [...] Anke Brian facis tre laudinda laboro, nam il transskribis la tota verko e sucesis mantenar olua aspekto e paginizo original.

 

Fine, ye la 17ma di oktobro 2024 me publikigis yena mesajo che Facebook en la grupo Ido-literaturo (integre lektebla hike):

 

[...] Aparis adminime quar edituri di La princeto, da Antoine de Saint-Exupéry, Ido-tradukita da Fernando Tejón (qua dume livis Ido). [...] Existas anke altra tradukuro (La mikra princo), da Herder Sa, ma ol ne ja publikigesis. Ol ankore (ja de longe) vartas revizo, redakto, aranjo, paginizo, ilustro ed edito...

 

En omna ta mesaji me uzis la vorto paginizo, qua cetere aparabis ja en 1918, en redakterala ped-noto en la revuo Mondo (tomi 7-10, p. 13, segun librala Google-resercho):

 

1 ) Co ja esas facita per aparta paginizo dil Sueda parto . Red .

 

Quon signifikas ta vorto? Nu, me ne trovis ol en papera vorto-libri, ed en Wikivortaro (hike) existas pagino pri ol, ma... ankore sen defino, ankore sen AFGHIR-tradukuri, do tote vakua!

Semblas a me ke on povus acepteble definar ol en la sequanta maniero:

paginizo: elaboro dil modelo di publikigota libro, revuo, edc, por determinar lua definitiva strukturo, aspekto e karakterizivi.

En nia fonto-lingui ol korespondas a:

A: (page) layout

F: mise en page

G Seitengestaltung, Layout

H: maquetación

I: impaginazione

R: вёрстка

E: enpaĝigo

Paginizo esas komplexa editala procedo qua implikas plura decidi e taski. Dum paginizar libro, revuo, edc on i.a.:

• selektas la uzota tipi e decidas pri lia grandeso;
• selektas la grandeso di marjini;
• selektas la spaco inter paragrafi e linei;
• numerizas la pagini;
• decidas pri la pozeso di imaji, grafikaji e subtexti;
• decidas pri la final aranjo di chapitri, tituli, subtituli, rezumo, edc;
• insertas la definitiva pagino-rupti (o -salti);
• organizas la texto en kolumni (tre ofta tasko lor paginizo di revui e jurnali).

En la lasta numero di Ido-Saluto! (2025 / 2), me lektas en la editala datumi (p. 24): 

Satz und Layout /

Kompostado e formizo

Thomas Schmidt

Bengt Klatte

Do la redakteri dil oficala organo di GIS (Germana Ido-Societo) uzas la termino formizo por expresar la sama koncepto quan me nomizis paginizo. Ta vorto ne esas mala, ma forsan tro generala, nam existas formizi qui nule relatas pagini, libri, revui, edc. Konseque, me duros dicar paginizo tam longe kam ne aparos plu bona vorto.